ုပေးချင်ပါတယ်။ ကဗျာဆိုတဲ့ ဝေါဟာရဟာ လွယ်ကူသယောင်နဲ့ နက်နဲဖော်ကျူးခက်ခဲတဲ့ ကျယ်ပြောမှုတစ်ရပ်လည်း ဖြစ်ပါတယ်။ ဒါပေမဲ့ … အနီးစပ်ဆုံး ဖော်ဆောင်ရရင်တော့ ကဗျာဟာ နှလုံးသား ခံစားမှုက အစပြုဖြစ်တည်ခြင်းလို့ ယူဆနိုင်ကောင်းမယ် ထင်ပါရဲ့။ ကဗျာဆရာဟာ သူ့ဘဝရဲ့ ဝေဒနာ၊ သူ့နှလုံးသားရဲ့ ခံစားမှု၊ သူ ထိတွေ့ပတ်သက် ခံစားမိသမျှ ဘဝလောကဒေသ အဝန်းအဝိုင်းရဲ့ အာရုံ၊ အတွေးအမြင်၊ ဒဿန၊ ဘဝအမြင်တွေကို ကဗျာအသွင်ပြောင်းလို့ ပြန်ပြောပြတတ်ပါတယ်။ ဆရာဟိန်းဆက်သွင်ရဲ့ ဖျောက် (နှလုံးသားအပိုင်းအစများ) ကဗျာစာအုပ်ထဲက ကဗျာတချို့ကို အကြိုခံစားကြည့်ပါဦး စာချစ်သူတို့ရေ …။ ' ကိုကိုရေ ' ဆိုတဲ့ ခေါ်သံလေးဟာ သံဝေဂ, မဲ့တဲ့ … အမြိုက်ရေအေးလို့ နှလုံးသွင်းတတ်ခဲ့တဲ့ … ဒီဘဝ, မင်းနဲ့ နီးရမယ်ဆို … [ကိုကို] သောတာပန်မဖြစ်လည်း နေတော့၊ နိဗ္ဗာန်မှာ … မင်းရယ်သံလေးတွေမှ မရှိဘဲ ညီမလေးရယ် … ‘သမုတိသစ္စာဖြင့် တွေ့မြင်အပ်သော ဟာဒယရုပ်ကြွင်းတစ်ခု၏ အလင်းနှစ်ခြေရာများ’ ဆိုတဲ့ ကဗျာရဲ့ အဆုံးပိုဒ်လေးဖြစ်ပါတယ်။ ဒီလို အချစ်ခံစားမှု ကဗျာတွေအပြင် … အချိုယှက်ကဲ၊ ထန်းလျက်ခဲမှာ၊ ပုရွက်မည်းများ အုံနေ၏ … ဆိုတဲ့ ‘ခေတ်’ လို့ အမည်ပေးထားတဲ့ ကဗျာမျိုးတွေကိုလည်း ဖတ်ရှုကြရမှာပါ။ ခေတ်ပေါ်မော်ဒန် ကဗျာအမျိုးအစားတွေ ပါဝင်သလို၊ ကာရန်နဘေနဲ့ အနုအလှ အချစ်ကဗျာတွေ၊ ဖတ်ရှုသူရဲ့ နှလုံးသားကို လွမ်းမြည့်ထိရှစေမယ့် ဝေဒနာခံစားမှု အလွမ်းကဗျာတွေ အပြင်၊ နိုင်ငံရေး၊ လူမှုရေး၊ ဘဝအရေး၊ အတွေးအမြင်တွေကို ကဗျာအသွင် ဖန်တီးပုံဖော်ထားတဲ့ ရသအဖုံဖုံ ကဗျာပေါင်း (၆၅)ပုဒ် ပါဝင်တဲ့ ‘ဖျောက်’ (နှလုံးသားအပိုင်းအစ) ကဗျာများ။ ဖျောက် ဆိုတဲ့ စာအုပ်ခေါင်းစဉ် ဦးတည်ချက်ကတော့ လက်ဖျစ်တစ်ချက်တီးစာ အချိန်အတွင်း အရာရာဟာ ပြောင်းလဲဖြစ်ပျက်တတ်ပုံကို ကဗျာဆရာက ဦးတည်ဖော်ပြချင်ပုံရပါတယ်။ ဒါကြောင့် တရားသဘော၊ အလွမ်းသဘော၊ လောကသဘောတွေကို ပြဆိုပုံဖော်ထားတဲ့ ဒီစာအုပ်လေးကို ကဗျာချစ်သူ စာချစ်သူတွေအတွက် ညွှန်းဆိုပေးလိုက်ပါတယ်။