�နွဲ့သော ဇာတ်အိမ်ကြီး။ ရာမယဏဇာတ်ကို အကြိမ်ပေါင်း မရေ မတွက်နိုင်အောင် ပြောလာခဲ့ကြသည်။ အမှောင်ထုမိစ္ဆာဖြစ်သော ရာဝဏကို သတ်ခဲ့သည့် ဘုရားဝင်စားသူ ရာမ၏ စွဲမက်ဖွယ်ဇာတ်လမ်းကို အိန္ဒိယသားတိုင်းသိကြသည်။ အမြဲတမ်းလိုလို သမိုင်းစာမျက်နှာများ၌ ရှင်သန်နေသည်မှာ အောင်နိုင်သူများကပြောသော ပုံစံမူသာဖြစ်သည်။ ရှုံးနိမ့်သူတို့၏အသံမှာ တိတ်ဆိတ်စွာ ပျောက်ကွယ်နေတတ်မြဲဖြစ်၏။ သို့ရာတွင် ရာဝဏနှင့် ၎င်း၏လူများ ၌ ကွဲပြားသော ဇာတ်လမ်းတစ်ပုဒ်ရှိခဲ့သည်ဆိုရပါမူ။ ရာဝဏ၏အကြောင်းကို မည်သည့်အခါကမျှ ပြောခဲ့ကြသည် မဟုတ်။ “အသူရာ”သည် ရှုံးနိမ့်သူ အသူရာတို့အကြောင်းကို ဖွဲ့ထားသောဇာတ်အိမ်ကြီးဖြစ်သည်။ နှစ်ပေါင်း ၃၀၀၀ ဖိနှိပ်ခံထားရသော အပယ်ခံအိန္ဒိယသားတို့၏ နှစ်သက်မြတ်နိုးခြင်းကို ခံလာခဲ့ရသောဇာတ်လမ်းဖြစ်၏။ ယခုအချိန်အထိ ထိုဇာတ်လမ်းကို မည်သည့် အသူရာကမျှ မပြောရဲခဲ့။ သို့သော် သေဆုံးသူများနှင့် ရှုံးနိမ့်သူ တို့က စကားပြောရမည့်အချိန် ရောက်လို့လာခဲ့ပြီဟု ဆိုရပေမည်။ “ကျွန်ုပ်အကြောင်းကို နှစ်ပေါင်းထောင်နှင့်ချီကာ အမနာပပြောကြပြီး ကျွန်ုပ်သေဆုံးခြင်းကို အိန္ဒိယနိုင်ငံရဲ့ နေရာပေါင်းစုံ ထောင့်ပေါင်းစုံမှာ နှစ်စဉ်ကျင်းပလေ့ရှိခဲ့ကြတယ်။ အဘယ်ကြောင့်ပါလဲ။ သမီးတော်အတွက် ဘုရား ရှင်များကို ကျွန်ုပ် စိန်ခေါ်ခဲ့တာကြောင့်လား။ ဇာတ်နိမ့်ဇာတ်မြင့်စနစ်ကို အခြေခံထားတဲ့ ဒေဝအုပ်ချုပ်မှုထမ်းပိုး အောက်ကနေ မျိုးနွယ်တစ်စုကို လွတ်မြောက်စေခဲ့တာကြောင့်လား။ ယခုပင် ရာဝဏ၏အသံကို ကြားကြကုန် လော့။ ကျွန်ုပ်က အသူရာမျိုးနွယ် ရာဝဏဖြစ်ပြီး ကျွန်ုပ်ဇာတ်လမ်းက ရှုံးနိမ့်သူတွေရဲ့အကြောင်းသာဖြစ်တယ်။” “ကျွန်ုပ်ဟာ မမြင်နိုင်တဲ့ အညတရ၊ စွမ်းအားမဲ့တဲ့ မပြောပလောက်သူသာဖြစ်တယ်။ ကျွန်ုပ်အကြောင်းကို ဘယ်တော့မှ မော်ကွန်းတင်ကဗျာအဖြစ် ရေးမှာမဟုတ်ဘူး။ ကျွန်ုပ်ဟာ ရာဝဏ နဲ့ ရာမ နှစ်ဦးစလုံးအတွက် ခံစား ခဲ့ရတယ်။ သူရဲကောင်းနဲ့ လူကြမ်း ဒါမှမဟုတ် လူကြမ်းနဲ့ သူရဲကောင်း။ ကြီးကျယ်မြင့်မြတ်တဲ့ လူတွေအကြောင်းကို ပြောတဲ့အခါမှာ ကျွန်ုပ်စကားသံဟာ မကြားနိုင်လောက်အောင် တိုးနေမယ်။ သို့ပေမယ့် ကျွန်ုပ်ကို အချိန် တခဏ လောက် ပေးပြီး ကျွန်ုပ်အကြောင်းကို နားထောင်လိုက်စမ်းပါ၊ ဘာဖြစ်လို့လဲဆိုတော့ ကျွန်ုပ်က ဘဒ္ဒရာ၊ ကျွန်ုပ်က အသူရာ ဖြစ်ပြီး ကျွန်ုပ်ဘဝက အရှုံးသမားဇာတ်လမ်း ဖြစ်လို့ပဲ”။ ရှေးခေတ်အသူရာအင်ပါယာသည် ဒေဝတို့၏ဖနောင့်အောက်၌ ချာလပတ်လည်ကာ စစ်မက်ဖြစ်ပွားနေ သော နိုင်ငံငယ်လေးများအဖြစ် တစစီ ပြိုကွဲနေခဲ့သည်။ အသူရာတို့သည် ငယ်ရွယ်သူ ကယ်တင်ရှင် ရာဝဏကို အားကိုးတကြီး မျှော်လင့်လျက်ရှိကြ၏။ ရာဝဏလက်ထဲတွင် ပိုမိုကောင်းမွန်သောကမ္ဘာရှိနေမည်ကို ယုံကြည်ကာ ဘဒ္ဒရာကဲ့သို့သော သာမန်လူများက ခေါင်းဆောင်ငယ်နောက်သို့ လိုက်ခဲ့ကြ၏။ အောင်မြင်ဖို့ရာအတွက် သံမဏိ စိတ်ဆန္ဒနှင့် မီးတောက်နေသည့် ရည်မှန်းချက်များရှိသော ရာဝဏသည် ၎င်း၏လူများကို အောင်ပွဲတစ်ခုမှ တစ်ခု သို့ ဦးဆောင်လာခဲ့ပြီးနောက် ဒေဝတို့ထံမှ ကျယ်ပြန့်သောအင်ပါယာကို အရယူနိုင်ခဲ့သည်။ သို့ရာတွင် ရာဝဏက အံ့ဘနန်း အောင်မြင်မှုရလာသောအခါမှာပင် ၎င်းတို့အတွက် အများကြီးပြောင်းလဲမသွားကြောင်းကို သနားစရာ အသူရာတို့ သိလိုက်ကြသည်။ ထိုအခါတွင် ရာဝဏက ပြုမူလုပ်ဆောင်ချက်တစ်ခုဖြင့် ကမ္ဘာ့သမိုင်းကို ပြောင်းလဲပစ်ခဲ့သည်။