�မင်းလူရဲ့ ငယ်ဘဝလက်ရာ … ပန်းကျောင်းဆိုတဲ့ ဒီဝတ္ထုလေးကို ကံ့ကော်ဝတ်ရည် စာပေကနေ ၂၀၁၉၊ ဇွန်လမှာ ပဉ္စမအကြိမ် ထုတ်ဝေပြီး စာဖတ်ပရိသတ်တွေ လက်ထဲ ပေးပို့လိုက်ပါပြီ။ ဆယ်တန်းကျောင်းသားဘဝ၊ ဆယ်တန်းတုန်းက သူငယ်ချင်းတွေ၊ ဆယ်ကျော်သက် လူငယ်ဘဝရဲ့ ရင်ခုန်သံတွေနဲ့အတူ ဒီစာအုပ်ကို ဖတ်ရှုရင်း ကြည်နူးစိတ်တွေ ဖြစ်မိမယ်၊ ဝမ်းသာဝမ်းနည်း ခံစားမှုတွေ ခံစားရမယ်၊ ဝေးဝေးအတိတ် ကာလတွေဆီ စိတ်ရထား ခရီးပြန်နှင်ရင်း အမည်ဖော်ပြရ ခက်ခဲစွာ လွမ်းကောင်း လွမ်းမိမယ်၊ ဖတ်ရင်းက ပြုံးတဲ့အခါ ပြုံးမိမှာဖြစ်သလို တချို့နေရာတွေမှာ ငေးငိုင်မှိုင်တွေသွားနိုင်ပါလိမ့်မယ်။ လူတိုင်းလူတိုင်းရဲ့ ဘဝမှာ အတိတ်တွေ ရှိသလို၊ သူငယ်ချင်းဟောင်းတွေ ရှိသလို၊ ရင်ခုန်ခဲ့ရဖူးတဲ့ လူငယ်ဘဝဦး ကာလတွေ ရှိသလို၊ အချစ်ဦးဆိုတာလည်း ရှိမှာ အမှန်ပဲ မဟုတ်လား။ ဆရာ မင်းလူ … အလွမ်းပြေ၊ တစ်ချိန်က ကျောင်းသားဘ၀ အလွမ်းပြေ၊ ရင်ခုန်ဦးဆီ အလွမ်းပြေပေါ့။ ပန်းကျောင်း လုံးချင်းဝတ္ထုလေးကို ပြန်ဖတ်ရင်း … ဟိုး တစ်ချိန်က ကာလတစ်ခုဆီ စာဝါကျတွေကနေ တစ်ဆင့်၊ ပြန်လည်ခရီးနှင်ကြပါစို့လား စာချစ်သူများ ခင်ဗျာ။