ဟိန္ဒူဘာသာများ နှင့် ရေးသားထားခဲ့ပြီး မူကွဲ ကျမ်းစာအုပ် အတော်များများလည်း ရှိခဲ့ပါတယ်။ အိန္ဒိယနိုင်ငံ၏ အဖိုးတန်ရတနာလို့ ဆိုရလောက်တဲ့ ဒီကျမ်းကို အိန္ဒိယမှာ ခေတ်အဆက်ဆက် လက်ဆင့်ကမ်း ပြုစုမွမ်းမံ ရေးသားခဲ့ကြသော စာရေးသူများစွာ ရှိခဲ့ပေမဲ့၊ Vatsyayana (ဝဆျာယဏ) ၏ ပေမူများကို အဓိက မှီငြိမ်းကိုးကား အခြေခံရေးကြတာပဲ ဖြစ်ပါတယ်။ ယခုထုတ်ဝေလိုက်တဲ့ ကာမသျှတ္တရကျမ်းကို Vatsyayana (ဝဆျာယဏ) မှ ရေးသား ပြုစုခဲ့ပြီး၊ Burton နဲ့ Arbuthnot တို့က သက္ကတမှ အင်္ဂလိပ်ဘာသာသို့ ပြန်ဆိုကာ Lance Dance က အခြားသက္ကတ မူကွဲများနှင့် ညှိနှိုင်းတည်းဖြတ်ထားပါတယ်။ အဲဒီ The complete illustrated (Kama Sutra)ကို လက်ျာသုန္ဒရက မြန်မာဘာသာသို့ ပြန်ဆိုထားတာပါ။ လွန်ခဲ့သော နှစ်ပေါင်း (၂ဝဝဝ)ကျော် မှ ယနေ့ခေတ်အထိ နိုင်ငံတကာမှာ သမိုင်းဝင်လေ့လာစရာ ကျမ်းတစ်ဆူအဖြစ် သတ်မှတ်ခဲ့ပြီး၊ နိုင်ငံပေါင်း (၁၅ဝ) ကျော်က အသီးသီး ဘာသာပြန်ဆို ထုတ်ဝေခဲ့ကြသော်လည်း မြန်မာဘာသာပြန် စာအုပ်အနေနဲ့ မရှိသေးပါဘူး။ မြန်မာ့လူ့အဖွဲ့အစည်း အတွင်းမှာတော့ ဒီစာအုပ်ကို လိင်မှုဆိုင်ရာ ညစ်ညမ်းစာအုပ်တစ်အုပ်အဖြစ် နှာခေါင်းရှုံ့ကြပါလိမ့်မယ်။ ဒါပေမယ့် ကာမသျှတ္တရဟာ ကျမ်းတစ်စောင်ဖြစ်ပါတယ်။ မြန်မာစာပေမှာ ဒီလိုစာအုပ်မျိုး လိုအပ်ချက်ရှိသည်ကို သိနားလည်သော ဆရာကြီးပီမိုးနင်း ကပင် ကာမသျှတ္တရကျမ်းထဲမှ စာဖတ်သူများ ဖတ်ရလွယ်စေရန် ဖြုတ်ပယ်တည်းဖြတ်ပြီး "ကာမသိဒ္ဓိ" နာမည်နဲ့ မြန်မာမှုပြုခဲ့ဖူးပါတယ်။ ဒီကျမ်းဟာ ရှေးနှစ်ပေါင်းများစွာထဲက အိန္ဒိယမှာ ''ကာမသျှတ္တရ ချစ်မှုရေးရာ အဆိုအမိန့်များ'' အဖြစ် ကျော်ကြားခဲ့ပါတယ်။ ကျမ်းပြစုသူ ဝဆျာယဏကိုလည်း ဟိန္ဒူစာပေရဲ့ ချစ်ရမ္မက်ရေးရာပိုင်း မှာ နိုင်နင်းကျွမ်းကျင်တဲ့ ဂုရုတစ်ဆူအဖြစ် နှောင်းခေတ် စာပေပညာရှင်တွေက သတ်မှတ်ခဲ့ပြီး၊ မည်သည့် သက္ကတ စာကြည့်တိုက်တွင် မဆို သူ့လက်ရာ စာပေမရှိပါက မပြည့်စုံနိုင်လို့တောင် ဆိုကြပါတယ်။ ''ချစ်မှုရေးရာအဆိုအမိန့်များ'' ဟူသော ခေါင်းစဥ်အောက်မှာ လင်္ကာ အပိုဒ်ပေါင်း (၁၂၅ဝ) ပါဝင်ပြီး၊ ၄င်းတို့ကို အခန်းကြီး (၇) ခန်း၊ အပိုင်း (၃၆) ပိုင်း ခွဲခြား ထားပါတယ်။ ယခု ကာမသျှတ္တရကျမ်းဟာ လူတွေရဲ့ အလိုရမ္မက်များကို ဖြေဖျောက်ရန် သက်သက်အတွက် မဟုတ်ပါ။ ဤကျမ်းစာအုပ်ပါ အချက်အလက်၊ အမှတ်အသားတွေကို ကောင်းစွာ နားလည် သဘောပေါက်ခဲ့ပါက လူသားတစ်ဦး အနေနဲ့ လောကီအာရုံခံစားမှု အစုစုတို့ကို ကျွမ်းကျွမ်းကျင်ကျင်ကိုင်တွယ် အသုံးပြုနိုင်မှာ ဖြစ်ပါတယ်။ ဒါမှသာ အလိုရမ္မက်၏ ကျေးကျွန်မဖြစ်ဘဲ ဓမ္မ၊ အာသာနှင့် ကာမတို့ကို ဉာဏ်ပညာနဲ့ယှဥ်ကာ ခွဲခြားသိမြင်နိုင်မှာ ဖြစ်တယ်လို့ ကျမ်းဦးအမှာစကားမှာ ဆိုထားပါတယ်။