စာရေးသူ - အောင်သင်း
စာမျက်နှာ - ၁၂၈
စာစီစာကုံးကို အလယ်တန်း၊ အထက်တန်း၊ တက္ကသိုလ် စတဲ့စာမေးပွဲတွေမှာ ရေးစေခြင်းဟာ လူတစ်ယောက်ရဲ့ အတွေ့အကြုံနဲ့ အတွေးအကြံကို စမ်းသပ်စစ်မေးခြင်း ဖြစ်တယ်လို့
ဆိုနိုင်ပါတယ်။ ဒီစာအုပ်ကတော့ ဆရာအောင်သင်းရဲ့ ကိုယ်တွေ့စာစီစာကုံး စာအုပ်ပဲ ဖြစ်ပါတယ်။ ကျောင်းသားလူငယ်တွေအတွက် ဆရာကြီးရဲ့ စေတနာထားမှုတွေထဲက တစ်ခုလို့လည်း တင်စားနိုင်ပါတယ်။ စာစီစာကုံးတွေနဲ့ ပတ်သက်ပြီး ဆရာကြီးက ဒီလို ရေးသားထားပါတယ်။
‘အလယ်တန်း၊ အထက်တန်း၊ တက္ကသိုလ်အဆင့်၊ ဝန်ထမ်းရွေးချယ်ရေး စသည့် စာမေးပွဲများတွင် စာစီစာကုံးကို ရေးစေခြင်းမှာ အခြေခံအားဖြင့် လူတစ်ယောက်၏ အတွေ့အကြုံနှင့် အတွေးအကြံကို စမ်းသပ်စစ်မေးခြင်း ဖြစ်သည်။ အတွေ့အကြုံတွင်လည်း ကိုယ်တွေ့နှင့် တစ်ဆင့်ခံ ကွဲပြားနိုင်ပါသေးသည်။ တစ်ဖန် တစ်ဆင့်ခံတွင်လည်း သူတစ်ပါး ပြောကြားသည်ကို မှတ်သားထားလိုက်ရမှုနှင့် စာအုပ်စာပေမှ ဖတ်ရှုမှတ်သားရမှု ဟူ၍ ကွဲပြားလာနိုင်ပါလိမ့်ဦးမည် ’
ဒီစာအုပ်ထဲမှာ ပါတဲ့ ဆောင်းပါးတွေကတော့ မဂ္ဂဇင်း စာစောင်တွေမှာ ဆရာဦးအောင်သင်း ရေးသားခဲ့ဖူးတဲ့ စာစီစာကုံးနဲ့ ပတ်သက်တဲ့ ဆောင်းပါးတွေကို စုစည်းထားတာပဲ ဖြစ်ပါတယ်။
